مصباح نے کھلاڑیوں کی مرغن غذائیں بند کر دیں

مصباح نے کھلاڑیوں کی مرغن غذائیں بند کر دیں
مصباح پلیئرز کی کارکردگی کا جائزہ لینے روزانہ قذافی اسٹیڈیم آ کر قائد اعظم ٹرافی کے میچ دیکھنے آتے ہیں۔۔۔۔۔۔۔۔۔۔۔فوٹو/ سوشل میڈیا

لاہور: مصباح الحق کے ہیڈ کوچ اور چیف سلیکٹر بننے کے بعد پاکستانی کرکٹ میں فٹنس اور کھانے کے کلچر میں نمایاں تبدیلی دکھائی دے رہی ہے۔ قومی اکیڈمی اور قائد اعظم ٹرافی میچوں میں مرغن کھانوں پر پابندی لگادی گئی ہے۔ انہوں نے کھلاڑیوں کے لئے فٹنس کو لازمی قرار دے دیا ہے۔


مصباح پلیئرز کی کارکردگی کا جائزہ لینے روزانہ قذافی اسٹیڈیم آکر قائد اعظم ٹرافی کے میچ دیکھنے آتے ہیں۔ اتوار کو قذافی اسٹیڈیم لاہور میں مصباح الحق تماشائیوں میں چلے گئے اور ان کے ساتھ تصویریں بنوائیں۔

پاکستانی ٹیم کے فیلڈنگ کوچ گرانٹ بریڈ برن لاہور میں ہیڈ کوچ مصباح الحق کے ساتھ مشاورت میں مصروف ہیں۔سڈنی سے لاہور پہنچنے کے بعد وقار یونس نے قذافی اسٹیڈیم میں قائد اعظم ٹرافی کا میچ دیکھا اور باؤنڈری لائن پر وہ بولروں سے بات چیت کرتے رہے۔

سری لنکا کی سیریز کی تیاریوں کے لئے پاکستانی ٹیم کا تربیتی کیمپ اٹھارہ اگست سے لگایا جائے گا۔

ذرائع کا کہنا ہے کہ مصباح الحق نے لاہور میں کیمپ ختم ہونے کے بعد کپتان سرفراز احمد سمیت 6 کھلاڑیوں کو گھر جانے سے روک دیا اور ان کو ہدایت کی کہ وہ اپنی فٹنس پر خاص کام کریں جب کہ ٹیموں کے کوچز کو بھی ہدایت کی گئی ہے کہ ہر کھلاڑی کی فٹنس کو مانیٹر کیا جائے۔

ذمے دار ذرائع کا کہنا ہے کہ مصباح الحق نے سب سے پہلے قومی اکیڈمی لاہور میں کھانے کا مینیو تبدیل کرا دیا ہے۔ اب اکیڈمی میں کھلاڑیوں کو مرغن کھانوں کے بجائے کم گھی والے ایسے کھانے دیئے جا رہے ہیں جن سے ڈائٹ کنٹرول کی جا سکے گی۔