اسلام آباد: وزیر اعظم شاہد خاقان عباسی نے پاکستان اسٹیل ملز کی بحالی اور ملازمین کے مسائل حل کرنے کے لیے فوری طور پر جامع پلان بنانے کی ہدایت کر دی ساتھ ہی پی آئی اے کی تنظیم نو کی منظوری بھی دی گئی۔
وزیر اعظم شاہد خاقان عباسی کی زیر صدارت نجکاری کمیٹی کا اجلاس منعقد ہوا جس میں وفاقی وزیر دانیال عزیز نے کمیٹی کو پی آئی اے اور پاکستان اسٹیل ملز سے متعلق بریفنگ دی۔ اس موقع پر وزیراعظم نے کہا کہ ماضی میں پی آئی اے اور پاکستان اسٹیل ملز بدانتظامی اور نظر انداز کرنے سے مالی بحران کا شکار ہوئے۔ دونوں اداروں کی بدانتظامی سے ملازمین کی مشکلات اور قرضوں میں اضافہ ہوا۔
اجلاس میں وزیر اعظم نے پاکستان اسٹیل ملز کی بحالی اور ملازمین کے مسائل کے حل کے لیے فوری جامع پلان بنانے کی ہدایت دی جب کہ کابینہ کمیٹی نجکاری نے تفصیلی بحث کے بعد پی آئی اے میں تنظیم نو کی منظوری دی اور پی آئی اے کے اہم اور غیر اہم شعبوں کو علیحدہ کرنے کا فیصلہ بھی کیا۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
