پی ٹی وی حملہ کیس میں تحریک انصاف کے تین رہنماؤں کی عبوری ضمانت منظور

پی ٹی وی حملہ کیس میں تحریک انصاف کے تین رہنماؤں کی عبوری ضمانت منظور

اسلام آباد: انسداد دہشت گردی کی عدالت نے پی ٹی وی حملہ کیس میں پی ٹی آئی رہنما عارف علوی، شیریں مزاری اور اسد عمر کی ضمانت قبل از وقت گرفتاری کی درخواستیں منظور کر لیں۔ اسلام آباد کی انسداد دہشت گردی کی عدالت کے جج شاہ رخ ارجمند نے پی ٹی وی اور پارلیمنٹ حملہ کیس کی سماعت کی اور اس سلسلے میں تحریک انصاف کے رہنما عارف علوی، شیریں مزاری اور اسد عمر ضمانت قبل از گرفتاری کے لیے عدالت میں پیش ہوئے۔


انسداد دہشت گردی کی عدالت نے تینوں ملزمان کی عبوری ضمانت منظور کرتے ہوئے پولیس کو تینوں ملزمان کی گرفتاری سے روک دیا۔ عدالت نے ضمانت کے عوض اسد عمر، شیریں مزاری اور عارف علوی کو ایک، ایک لاکھ روپے کے مچلکے جمع کرانے کا حکم دیا جب کہ تینوں کو 23 جنوری کو دوبارہ پیش ہونے کا بھی حکم دیا گیا ہے۔

یاد رہے کہ انہی مقدمات میں چیئرمین تحریک انصاف عمران خان بھی انسداد دہشت گردی کی عدالت میں پیش ہو چکے ہیں اور عدالت نے 2 جنوری کے روز چاروں مقدمات میں ان کی ضمانت منظور کی تھی۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں