کہتا ہے میرے گھر میں کوئی نہیں سوائے جادوگرنی کے،اندر سے فائرنگ کیا جنات کر رہے ہیں؟ شرجیل میمن 

کراچی : وزیر اطلاعات سندھ شرجیل انعام میمن نے کہا ہے کہ  عمران خان کہتا ہے میرے گھر میں کوئی نہیں سوائے جادوگرنی کے۔ اور اندر سے پولیس پہ سٹریٹ فائر ہو رہے ہیں۔ اگر جادوگرنی کے سوا اندر کوئی نہیں تو کیا جنات فائر کر رہے ہیں اندر سے؟ ۔

کراچی میں نیوز کانفرنس میں شرجیل میمن نے کہا کہ جو سلیکٹڈ وزیر اعظم تھا اسے روزانہ ریلیف مل رہا ہے ۔اداروں کے خلاف گھناؤنی مہم صدر عارف علوی کا بیٹا چلوا رہا ہے۔  عمران خان نے اپنے ہاتھوں سے ڈرامے کرائے، یہ غنڈہ گردی کے ذریعے حکومت میں آنا چاہتے ہیں، یہ سمجھتے ہیں کسی بھی موقع پر عدالت انہیں نہیں بلاسکتی۔

پیپلز پارٹی کے رہنما نے کہا کہ عمران خان خود کو آئین سے بالاتر سمجھتے ہیں، ماضی میں بڑے لیڈران نے عدالتوں کا سامنا کیا۔ 50 سے زائد پولیس والوں کو زخمی کیا لیکن عدالت سے ضمانت مل گئی، صدر کہتا ہے کہ عمران خان کے خلاف سازش ہے، کون سے ملک میں ایسا ہوتا ہے، کون کر رہا ہے سازش، عدالت سازش کر رہی ہے؟

انہوں نے کہا کہ صدر عارف علوی کا بیٹا سوشل میڈیا پر اداروں کے خلاف سازش چلا رہا ہے۔ پیپلز پارٹی سمجھتی ہے کہ ہمارے لیے 2 مقدمات اہم ہیں، پہلا مقدمہ ذوالفقار بھٹو کا جو عدالتی قتل کیا گیا، 10سال سے اوپر ہوگئے لیکن ذوالفقار بھٹو کے ریفرنس کو نہیں سناجارہا۔

پی پی رہنما نے کہا کہ آئین کے بانی کے مقدمے کو نہیں سنا جارہا ہے، ہمیں ذوالفقار علی بھٹو کے ریفرنس کا فیصلہ چاہیے۔ دوسرا مقدمہ بینظیر بھٹو کی شہادت کا مقدمہ ہے، خانہ پوری کر کے مقدمے کو ملتوی کردیا جاتا ہے۔ ہمارے کیس کو سننے کے لیے عدالت کے پاس وقت نہیں، پیپلز پارٹی کی لیڈرشپ نے پاکستان کے لیےجان تک قربان کی۔

پیپلز پارٹی کے رہنما نے کہا کہ ایک سلیکٹڈ وزیراعظم کو چھٹی کے دن بھی ریلیف مل جاتا ہے، آج ہمارے ورکر ہم سےسوال کر رہے ہیں کہ دہرا معیار کیوں ہے اور اپنے کیسز جلدی چلوانے کے لیے ہم بھی یہی کرنا شروع کردیں؟