کراچی :کراچی جلسے سے بڑی خبرآگئی ہے ،ایک سوال کے جواب میں کیا بلاول بھٹو بھی نواز شریف نے جو کچھ کہا اس کے ساتھ کھڑے ہیں ،کے جواب میں بلاول کا کہنا تھا پیپلزپارٹی پی ڈی ایم کے پلیٹ فارم اور اے پی سی کی قراردادوں پر ساتھ کھڑی ہے ،جو بھی فیصلے پی ڈی ایم کے پلیٹ فارم پر ہو نگے ہم ان کا ساتھ دینگے ۔
کراچی جلسے میں آمد کے موقع پر میڈیا سے گفتگوکرتے ہوئے بلاول بھٹو کا کہنا تھا کہ پیپلزپارٹی پی ڈی ایم کے پلیٹ فارم پر ہونے والے فیصلوں اور اے پی سی کی قراردادوں پر تمام سیاسی پارٹیوں کیساتھ کھڑی ہے ،صحافی نے سوال کیا تھا کہ کیا نواز شریف نے گوجرانولہ جلسے میں جو کچھ کہا بلاول بھٹو ان کیساتھ کھڑ ے ہیں ،جس کے جواب میں بلاول بھٹو نے اپنا موقف واضح کیا ۔
اس سے قبل وزیر اطلاعات پنجاب فیاض الحسن چوہان کا کہنا تھا کہ بلاول زرداری کی ملک دشمنی پر مبنی تقاریر سےدوری خوش آئند ہے، غیرمتحدہ اپوزیشن میں یہ اختلاف بارش کا پہلا قطرہ ثابت ہو گا۔
تفصیلات کے مطابق لاہور سے جاری بیان میں وزیر اطلاعات پنجاب فیاض الحسن چوہان کا کہنا تھا کہ پی پی نے کراچی جلسے میں نواز شریف کی تقریر نشر نہ کرنے کا مؤقف اپنایا ہے، بلاو ل نے نوازشریف کی تقاریر کو افسوس ناک قرار دے کرعقل مندی کا ثبوت دیا،فیاض چوہان کا کہنا تھا کہ چیئرمین پی پی کی ملک دشمنی پر مبنی تقاریر سے دوری خوش آئند ہے، امید ہے کہ آصف اور بلاول زرداری اپنےجرات مندانہ فیصلے پر قائم رہیں گے۔
اپنے بیان میں صوبائی وزیر اطلاعات پنجاب نے کہا کہ چند ہفتوں میں اپوزیشن کا یہ غیر سیاسی اتحاد پارہ پارہ ہوتا نظر آ رہا ہے، اس اختلاف کی بنیادی وجہ کوئی اور نہیں، ن لیگ اور میم لیگ ہیں، کیونکہ نون اور میم لیگ جتنا کھل کر کھیلے گے اُس سے اپنا اور پی ڈی ایم کا بیڑہ غرق ہی کریں گے،فیاض الحسن چوہان کا مزید کہنا تھا کہ گوجرانوالہ جلسے میں نواز شریف کی سوشل میڈیا کے زریعے کی گئی تقریر کے باعث ملک بھر میں پی ڈی ایم کے خلاف نفرت میں اضافہ ہوا ہے، نواز شریف بھارتی اسٹیبلشمنٹ کی زبان بولتے ہوئے زہر اُگل رہا ہے۔
پی ٹی آئی رہنما نے مزار قائد کی بے حرمتی کرنے پر مریم نواز اور کیپٹن (ر) صفدر سے معافی مانگنے کا مطالبہ کرتے ہوئے کہا کہ مریم نواز اور اس کے میاں نے جو مزار قائد پر کیا اس پر قوم سے معافی مانگیں، اگر یہ معافی نہ مانگیں توسمجھ جائیں مودی کے ایجنڈے پر چل رہے ہیں۔
