ابوظبی : متحدہ عرب امارات میں آئی سی سی ٹی ٹوئنٹی ورلڈ کپ کے پہلے راؤنڈ کے تیسرے میچ میں آئرلینڈ نے نیدرلینڈز کو 7 وکٹوں سے شکست دے دی۔
ٹی 20 ورلڈ کپ کے ابتدائی راؤنڈ میں دوسرے دن آئرلینڈ اور نیدرلینڈز کی ٹیمیں مدمقابل ہوئیں۔ ابوظبی میں کھیلے جانے والے اس میچ میں نیدرلینڈز نے ٹاس جیت کر پہلے بیٹنگ کا فیصلہ کیا اور 8 وکٹ کے نقصان پر مقررہ 20 اوورز میں 106 رنز بنائے۔ نیدرلینڈز نے آئرلینڈ کو 107 رنز کا ہدف دیا جسے آئرلینڈ نے باآسانی 3 وکٹ کے نقصان پر حاصل کرلیا۔
آئرلینڈ کے باؤلر کرٹس کیمفر اپنے ملک کی طرف سے ٹی 20 کرکٹ میں ہیٹ ٹرک کرنے والے پہلے باؤلر بن گئے۔ کیمفر نے چار گیندوں پر نیدرلینڈ کے چار کھلاڑیوں کو آؤٹ کیا۔ یہ اس ٹورنامنٹ کی پہلی ہیٹ ٹرک بھی ہے۔
گزشتہ روز ٹی ٹوئنٹی ورلڈ کپ کے پہلے میچ میں عمان نے پاپوانیوگنی کو 10 وکٹوں سے شکست دے دی تھی جب کہ دوسرے میچ میں اسکاٹ لینڈ نے بنگلا دیش کو 6 رنز سے ہرا دیا تھا۔
