راولپنڈی میں 12 سالہ لڑکی کو ونی کرنے کی کوشش اس وقت ناکام بنا دی گئی جب جرگہ نے لڑکی کے بھائی کے کسی لڑکی کیساتھ مراسم کی سزا اس کی بہن کو دینے کی کوشش کی ۔
تھانہ رتہ امرال پولیس نے مدعیہ مقدمہ کی درخواست پر فوری کارروائی کرتے ہوئے لڑکی کے تین بھائیوں، دو خواتین سمیت سات افراد کو گرفتار کرلیا۔ مدعیہ مقدمہ کے مطابق اس کے بیٹے شاکر کے ایک لڑکی سے مراسم تھے جس پر جرگہ نے میری بیٹی کو ونی کا فیصلہ کیا جبکہ تینوں بیٹوں نے ساتھیوں کے ساتھ میری بیٹی کو ونی کیلئے اغواء کیا اور مزاحمت کرنے پر مجھ پر بھی تشدد کیا۔
ترجمان راولپنڈی پولیس کے مطابق ایس ایچ او رتہ امرال نے فوری طور پر کاروائی کرتے ہوئے لڑکی کو بحفاظت بازیاب کروالیا، گرفتار ملزمان میں لڑکی سے شادی کا خواہشمند جعفر اسکی خالہ شریفاں، بھابھی طاہرہ اور ایک جرگوئی ارسلان اور مدعیہ کے بیٹے شاکر، سیف اور سلیمان بھی شامل ہیں۔
