امریکا کا آبنائے ہرمز میں ایرانی ڈرون مار گرانے کا دعویٰ

امریکا کا آبنائے ہرمز میں ایرانی ڈرون مار گرانے کا دعویٰ
ایران کی بین الاقوامی پانیوں میں موجود جہاز کے خلاف کارروائی انتہائی اشتعال انگیز اور دشمنانہ ہے، ٹرمپ۔۔۔۔۔۔۔فوٹو/ بشکریہ بی بی سی

واشنگٹن: امریکی صدر ڈونلڈ ٹرمپ نے آبنائے ہرمز میں ایرانی ڈرون مار گرانے کا دعویٰ کیا ہے۔ عرب میڈیا کے مطابق امریکی صدر ٹرمپ نے وائٹ ہاؤس میں اعلان کرتے ہوئے کہا کہ امریکی بحری جہاز یو ایس ایس باکسر نے جمعرات کو دفاعی کارروائی کرتے ہوئے ایرانی ڈرون کو مار گرایا ہے جس سے جہاز اور عملے کو سیکیورٹی خدشات تھے۔


امریکی صدر نے اس حوالے سے مزید تفصیلات دیے بغیر صرف ڈرون کو تباہ کرنے سے آگاہ کیا۔

امریکی صدر کا کہنا تھا ایران کی بین الاقوامی پانیوں میں موجود جہاز کے خلاف کارروائی انتہائی اشتعال انگیز اور دشمنانہ ہے۔ امریکا اپنے مفادات کے تحفظ کا حق رکھتا ہے۔

ٹرمپ نے مزید کہا کہ وہ دیگر اقوام کو بھی کہتے ہیں کہ وہ ہمارے ساتھ مستقبل میں کام کرنے کے لیے آبنائے ہرمز سے گزرنے والے اپنے جہازوں کی حفاظت کریں۔

امریکی صدر نے دیگر قوموں سے مطالبہ کیا کہ وہ جہازوں کے ذریعے ایران کی بین الاقوامی تجارت کی مذمت کریں۔

امریکی محکمہ دفاع پینٹاگون کے مطابق بین الاقوامی پانیوں میں ایرانی ڈرون تباہ کرنے کا واقعہ جمعرات کی صبح 10 بجے کے قریب پیش آیا جب امریکی بحری جہاز یو ایس ایس باکسر خلیج میں داخل ہو رہا تھا۔

پینٹاگون کے ترجمان نے بتایا کہ ایرانی ڈرون خطرناک حد تک جہاز کے انتہائی قریب آیا جس کے بعد جہاز نے اپنا تحفظ یقینی بنانے کے لیے دفاعی ایکشن لیا۔

دوسری جانب ایرانی وزیر خارجہ جواد ظریف نے کہا ہے کہ ایران کے پاس ڈرون گرائے جانے کی کوئی اطلاع نہیں ہے۔