لاہور: پنجاب حکومت کا وزیر اعظم عمران خان کے بلین ٹری سونامی پروگرام کے تحت پنجاب میں اگست کے پہلے ہفتے میں " پلانٹ فار پنجاب ڈے" منانے کا فیصلہ ۔
تفصیلات کے مطابق پلانٹ فار پنجاب ڈے پر ایک دن میں 10 لاکھ سے زائد پودے لگائے جائیں گے ۔ صوب بھر میں ڈویژن ، ضلع اور یونین کونسل کی سطح پر شجرکاری کیلئے تقریبات ہونگی ۔
خیال رہے کہ فیصلہ وزیر اعظم کے معاون خصوصی برائے ماحولیاتی تبدیلی ملک امین اسلم اور صوبائی وزیر جنگلات سبطین خان کی زیرصدارت اجلاس میں کیا گیا ۔
چیف سیکرٹری پنجاب ، جنگلات ، زراعت ، سکولز ایجوکیشن ، ہائر ایجوکیشن کے محکموں کے سیکرٹریز نے اجلاس میں شرکت کی ۔ اس کے علاوہ بلدیات ، صحت ، کواپریٹو کے محکموں کے سیکرٹریز ، ڈی جی پی آر پنجاب اور متعلقہ افسران اور ڈویژنل کمشنرز ویڈیو لنک کے ذریعے شریک ہوئے ۔
اس موقع پر ملک امین اسلم نے کہا کہ ملک میں پہلی مرتبہ اتنے وسیع پیمانے پر شجرکاری ہو رہی ہے ۔ پلانٹ فار پاکستان ڈے تمام صوبوں میں ایک فیسٹیول کی طرح منایا جائے گا ۔ انہوں نے کہا کہ شجرکاری میں سول سوسائٹی ، رفاعی تنظیموں اور ٹائیگر فورس کو بھی شامل کیا جائیگا ۔
سبطین خان نے کہا کہ ماحول کے تحفظ کیلئے درخت لگانا از حد ضروری ہے ۔ خدمت آپکی دہلیز پروگرام کے ہفتہ شجرکاری کے دوران تین لاکھ 80 ہزار سے زائد پودے لگائے گئے ۔ انہوں نے کہا کہ وزیر اعظم کے بلین ٹری سونامی پروگرام کی کامیابی کیلئے محکمہ جنگلات دن رات ایک کر دے ۔
