دبئی کے گراؤنڈ میں ایشیا کپ کا اہم ترین میچ پاکستان اور بھارت کے درمیا ن جاری ہے ،جس میں دونوں ٹیموں کے کھلاڑی بھرپور جان مار رہے ہیں ۔آج پاکستان نے ٹاس جیتا تو سرفراز احمد نے پہلے بیٹنگ کا فیصلہ کیا،فخر زمان اور امام الحق بیٹنگ کے لیے میدان میں آئے لیکن وہ اچھی کار کردگی کا مظاہرہ نہ کر سکے اور اس طرح پاکستان کو آغاز میں ہی دو وکٹوں کا نقصان ہو گیا ۔
اس کے بعد آنے والے بابر اعظم اور شعیب ملک نے ٹیم کو سہارا دیا لیکن بابر اعظم 47 رنز بنا کر کلدیپ کی گیند پر بولڈ ہو گئے بعد میں قومی ٹیم کے کپتان سرفراز احمد بھی ذمہ دارانہ بیٹنگ نہ کر پائے اور 6 رنز بنا کر پویلین کی جانب لوٹ گئے ۔سرفراز احمد کے آؤٹ ہونے کے بعد شعیب ملک کی ہمت بھی جواب دے گئی 43 رنز کے انفرادی اسکور پر رن آؤٹ ہو گئے ۔محمد آصف بھی کیدار جادیو کی جادوائی گیند کا شکار ہو گئے ۔شاداب خان بھی کیدار جادیو کا نشانہ بن گئے۔
ادھر بھارتی باولرز نے آغاز میں بہترین باؤلنگ کا مظاہرہ کیا اور پاکستان کی 7 وکٹیں لینے کے ساتھ ساتھ سکور بھی روک کر رکھا لیکن اس کوشش کے دوران بھارت کے اہم ترین بلے باز ان فٹ ہو کر پویلین لوٹ گئے ۔
بھارتی کھلاڑی ہردیک پانڈیا پانچواں اوور کرنے میدان میں آئے تو ان کا باڈی لینگوئج سست دکھائی دے رہے تھا اسی دوران پانچویں اوور کی پانچویں گیند پر ہردیک پانڈیا پچ پر گر گئے اور ان فٹ ہو کر میدان سے باہر پویلین لوٹ گئے ۔ہردیک پانڈیا کی انجری اتنی شدید تھی کہ انہیں سٹریچر پر لٹا کر پویلین لے جا یا گیا ۔واضح رہے کہ چیمپنز ٹرافی کے فائنل میچ میں ہردیک پانڈیا نے پاکستان کے خلاف دھواں دار بیٹنگ کرتے ہوئے بیالیس گیندوں پر 76سکور مارا تھا ۔
