اسلام آباد: ترجمان پی ٹی آئی فواد چودھری نے کہا ہے کہ تحریک انصاف آرمی چیف کیلئے نیک خواہشات رکھتی ہے ۔ شہبازشریف کے بیان کا مقصد فوج اور عوام میں فاصلے پیدا کرنا ہے۔
فواد چودھری نے وزیراعظم شہباز شریف کے بیان پر ردعمل میں کہا کہ چاہتے ہیں فوج الیکشن کرانے میں الیکشن کمیشن کی مدد کرے اور پاکستان کا ماحول بہتر ہو ۔ پی ڈی ایم عوام اور ادارے کو لڑا کر لوٹ مار جاری رکھنا چاہتی ہے۔
واضح رہے کہ وزیر اعظم شہباز شریف نے فوج اور اس کے سربراہ کے خلاف بیرون ملک غلیظ مہم کی شدید مذمت کرتے ہوئے کہا تھا کہ آرمی چیف کے خلاف مہم ناقابل برداشت اور اداروں کے خلاف سازش کا تسلسل ہے ۔
انہوں نے کہا کہ بیرون ملک محب وطن پاکستانی فارن فنڈڈ مہم کے خلاف آواز بلند کریں ۔ زہریلی سیاست کو بیرون ملک پاکستانیوں کے ذریعے پھیلا رہے ہیں۔بیرون ملک پاکستانی اس سازش کا حصہ نہ بنیں ۔
انہوں نے کہا کہ عمران خان اداروں اور ان کے سربراہوں کو اپنی گندی سیاست میں گھسیٹ کر آئین شکنی کر رہے ہیں ۔ وزیر داخلہ ملک کے اندر اداروں کے خلاف غلیظ مہم چلانے والوں سے آہنی ہاتھوں سے نمٹیں ۔
وزیر اعظم شہباز شریف نے کہا کہ پاکستان میں افراتفری ، فساد اور بغاوت کو ہوا دینے والوں کے خلاف سخت قانونی کارروائی کی جائے ۔ تاریخ میں پہلی بار میرٹ پر لگنے والے آرمی چیف کے خلاف مہم ملک دشمنوں کا ایجنڈا ہی ہو سکتا ہے ۔قوم اپنے اداروں کے ساتھ کھڑی ہے، شرپسندوں کے خلاف متحد ہے۔
