نئی دہلی :سمندری طوفان 'تاؤتے' کی بھارت میں تباہ کاریاں سے ہلاکتوں کی تعداد 90 سے زائد ہو گئی ۔
تفصیلات کے مطابق بھارت میں سمندری طوفان کے باعث ڈوبنے والے تیل بردار بحری جہاز سے 26 مزدوروں کی لاشیں نکال لی گئی ،جبکہ 49 افراد کی تلاش ابھی بھی جاری ہے ۔؎
سمندری طوفان سے بھارت کی چھ ریاستوں میں تباہ ہوئی ، صوبہ گجرات میں 17 ہزار گھر وں کو نقصان پہنچا ، مختلف علاقے ابھی بھی بجلی سے محروم ہیں ۔40 ہزار سے زائد درخت اکھڑ گئے۔ متاثرہ علاقوں میں امدادی کارروائیاں جاری ہیں ۔
واضح رہے کہ بھارت میں سمندری طوفان تاؤتے کے باعث بڑی کشتی ڈوبنے سے درجنوں افراد لاپتا ہو گئے جبکہ 22 افراد کی لاشیں نکال لی گئیں تھیں ۔
بھارتی شہر ممبئی میں طوفان تاؤتے کی وجہ سے کشتی سمندر کی بے رحم موجوں کی نذر ہوگئی جس کی وجہ سے اس میں سوار 261 افراد ڈوب گئے جن میں سے 184 افراد کو ریسکیو کرلیا گیا ہے۔
میڈیا رپورٹس میں بتایا گیا ہےکہ حادثے کے بعد بھارتی نیوی نے اب تک 22 افراد کی لاشیں سمندر سے نکال لی ہیں جب کہ دیگر افراد تاحال لاپتا ہیں جن کی تلاش کے لیے ریسکیو آپریشن جاری ہے۔
بھارتی بحریہ کا کہنا ہے کہ ریسکیو آپریشن میں بحریہ کے ہیلی کاپٹر بھی حصہ لے رہے ہیں جب کہ سمندر کی لہریں 25 فیٹ تک بلند ہونے کی وجہ سے آپریشن میں پریشانی کا سامنا ہے۔
میڈیا رپورٹس کے مطابق طوفان کے سبب سمندر میں پھنسنے والی کشتی انڈین آئل اینڈ نیچرل گیس کارپوریشن کی ہے جو ڈرلنگ کے لیے سمندر میں موجود تھی۔
میڈیا رپورٹس میں بتایا گیا ہے کہ طوفان کے باعث تین دیگر کمرشل کشتیاں بھی سمندر میں پھنس گئی تھیں جن میں سے 35 افراد کو ریسکیو کر لیا گیا ہے۔
بھارت میں طوفان تاؤتے نے تباہی مچارکھی ہے جس کے نتیجے میں ہونے والی طوفانی بارشوں سے ہزاروں گھر تباہ ہوچکے ہیں اور متعدد گاؤں زیر آب آگئے جب کہ حادثات میں درجنوں افراد ہلاک ہوچکے ہیں۔
