کراچی: اداکارہ و ہوسٹ نادیہ خان نے رکن سندھ اسمبلی اور پیپلز پارٹی کی رہنما شرمیلا فاروقی کی والدہ انیسہ فاروقی کے ساتھ ایک شادی کی تقریب میں بنائی گئی مکمل ویڈیو شئیر کر دی ہے۔تاکہ اپنے آپ کو بے قصور ثابت کر سکیں تاہم شرمیلا فاروقی مذکورہ ویڈیو پر ناپسندیدگی کا اظہار کرتے ہوئے نادیہ خان کیخلاف ایف آئی اے سائبر کرائم ونگ کو درخواست بھی دے چکی ہیں۔
تفصیلات کے مطابق اداکارہ نادیہ خان نے اپنے انسٹاگرام اکاؤنٹ پر تنازعہ کی وجہ بننے والی ویڈیو کلپ کو مکمل حصہ شیئر کر دیا ہے جس میں وہ انیسہ فاروقی سے اُن کے میک اپ اور ملبوسات کے بارے میں سوالات کر رہی ہیں۔
ee164437d57feb5ee2bed108982e21ff
نادیہ خان نے ویڈیو شیئر کی اور کیپشن میں لکھا کہ ’یہ سب ٹائٹلز (ویڈیو کے نچلے حصے میں ویڈیو کے دوران بولے گئے الفاظ کی لکھائی) کے ساتھ مکمل ویڈیو ہے جس میں کوئی ایڈیٹنگ نہیں کی گئی۔‘
انہوں نے سوال کرتے ہوئے پوچھا کہ کیامکمل ویڈیو میں کوئی ایک ایسا لفظ تلاش کر سکتے ہیں جو نا مناسب یا غیر اخلاقی کہلایا جا سکے؟
واضح رہے کہ دو روز قبل پی پی رہنما شرمیلا فاروقی نے نادیہ خان کیخلاف سائبر کرائم میں باضابطہ شکایت درج کروا دی تھی۔
شرمیلا فاروقی نے مارننگ شو ہوسٹ کیخلاف شکایت سےمتعلق ٹوئٹر پر اطلاع دی، انہوں نے ٹوئٹ کرتے ہوئے لکھا کہ نادیہ خان کیخلاف باضابطہ طور پر ایف آئی سائبر کرائم کو شکایت درج کروا دی ہے۔
https://twitter.com/sharmilafaruqi/status/1484135778523439107?s=20
یاد رہے کہ گزشتہ دنوں اداکارہ صبور علی کی شادی کی تقریب میں نادیہ خان اور شرمیلا فاروقی کی والدہ (انیسہ فاروقی) کی ایک ویڈیو سامنے آئی تھی جس میں نادیہ خان شرمیلا فاروقی کی والدہ سے ان کے میک اپ کے بارے میں سوالات کر رہی ہیں جس کو پی پی رہنما سمیت سوشل میڈیا صارفین نے بھی طنزیہ محسوس کیا اور نامناسب قرار دیا، ویڈیو پر ردِ عمل دیتے ہوئے شرمیلا فاروقی نے نادیہ خان کو بے شرم خاتون کہا اور انکے خلاف سائبر کرائم میں شکایت درج کرانے کا بھی اعلان کیا تھا۔
دوسری جانب شرمیلا فاروقی کی اپنے خلاف کارروائی کی دھمکی پر ردِِ عمل بھی دیتے ہوئے مارننگ شو ہوسٹ و اداکارہ نادیہ خان نے شرمیلا فاروقی کو جواب بھی دیا ، انہوں نے کہا کہ ' ایسا کچھ غلط نہیں کیا اور نہ کچھ غلط کہا، میرے خلاف سخت الفاظ کا استعمال بند کریں'
واضح رہے کہ شرمیلا فاروقی کا شمار پاکستان کی نامور خاتون سیاست دانوں میں ہوتا ہے جو ایک دہائی سے زیادہ عرصے سے سیاست میں ہیں۔شرمیلا فاروقی کا تعلق ایک سیاسی گھرانے سے ہے۔ ان کے والد ایک مشہور سیاست دان تھے۔ وہ پارٹی کے آغاز سے ہی پاکستان پیپلز پارٹی سے وابستہ ہیں۔ان کی شادی 2015 میں ہشام ریاض شیخ سے ہوئی جن سے ان کا ایک بیٹا حسین ہے۔
دوسری جانب نادیہ خان بھی پاکستان کی شوبز انڈسٹری کی معروف شخصیت ہیں جو اداکاری سے لیکر مارننگ شو ہوسٹ کے طور پر ٹی وی اسکرین پر نظر آتی رہی ہیں۔
