جنوبی کیرولینا میں چھت گرنے سے ڈانس پارٹی میں شریک 30 افراد زخمی

جنوبی کیرولینا میں چھت گرنے سے ڈانس پارٹی میں شریک 30 افراد زخمی
image by facebook

واشگنٹن: امریکی ریاست جنوبی کیرولینا میں چھت گرنے سے ڈانس پارٹی میں شریک 30 افراد زخمی ہوگئے۔


غیرملکی خبررساں ادارے کے مطابق امریکی ریاست جنوبی کیرولینا میں چھت گرنے سے ڈانس پارٹی میں شریک 30 افراد زخمی ہوگئے، ملبہ گرنے اور بھگدڑ مچنے سے زخمی ہونے والے افراد کو اسپتال منتقل کردیا گیا۔

حادثہ اس وقت پیش آیا جب عمارت میں موجود سلیمسن یونیورسٹی کے طلباء این سی اسٹیٹ کے خلاف رگبی میچ میں کامیابی کے بعد جشن منا رہے تھے۔

پولیس کے مطابق حادثہ اتوار کی صبح پیش آیا جب عمارت میں تقریب جاری تھی، عمارت کی پہلی منزل کی چھت  سے طلباء نیچے آگرے، حادثے کی تحقیقات شروع کردی گئی ہیں۔

مذکورہ کلب ہاؤس کے پراپرٹی مینجمنٹ کا کہنا ہے کہ عمارت 2004 میں تعمیر ہوئی تھی تاہم انہوں نے یہ نہیں بتایا کہ عمارت کے اندر کتنے افراد کے رہنے کی گنجائش تھی یا جب حادثہ پیش آیا تو وہاں زیادہ تعداد میں لوگ موجود تھے۔