فاروق ستار بہادر آباد رابطہ کمیٹی تحلیل کرنے کے مطالبے سے دستبردار

فاروق ستار بہادر آباد رابطہ کمیٹی تحلیل کرنے کے مطالبے سے دستبردار

کراچی: متحدہ قومی موومنٹ کے پی بی آئی گروپ کے سربراہ فاروق ستار بہادر آباد رابطہ کمیٹی تحلیل کرنے کے مطالبے سے دستبردار ہو گئے۔ فاروق ستار کا کہنا ہے کہ وہ بہادر آباد رابطہ کمیٹی تسلیم کرنے کو تیار ہیں لیکن ان کے یا عامر خان میں سے کسی ایک کا انتخاب کرنا ہو گا۔

فاروق ستار نے الزام عائد کیا کہ عامر خان جرائم میں ملوث افراد کو ٹاؤن اور یوسیز میں لگا رہے ہیں ایسی ایم کیو ایم میں کام نہیں کر سکتا جس میں بدنام زمانہ لوگ ہوں۔

یہ بھی پڑھیں:  ن لیگ اور پیپلزپارٹی سے اتحاد نہیں کریں گے ، عمران خان
 

ایم کیو ایم پی آئی بی گروپ کے سربراہ کا مزید کہنا تھا کہ نوکری کرنا خالد مقبول صدیقی کو منظور ہے تو کریں لیکن وہ ایسی نوکری نہیں کر سکتے۔

یاد رہے کہ بانی ایم کیو ایم کی پاکستان مخالف تقریر کے بعد 23 اگست 2016 کو فاروق ستار نے پارٹی کے بانی سے علیحدگی کا اعلان کرتے ہوئے ایم کیو ایم پاکستان کی بنیاد رکھی تھی۔ سینیٹ انتخابات میں ٹکٹوں کی تقسیم اور اس وقت پارٹی کے ڈپٹی کنوینئر کامران ٹیسوری کے معاملے پر ایم کیو ایم پاکستان دو دھڑوں میں تقسیم ہو گئی تھی۔

مزید پڑھیں: نواز شریف اور ان کی صاحبزادی لندن سے واپس وطن پہنچ گئے

ایم کیو ایم بہادر آباد گروپ کی قیادت خالد مقبول صدیقی، فیصل سبزواری اور کنور نوید جمیل کر رہے ہیں جبکہ ایم کیو ایم پی آئی بی گروپ کے سربراہ ڈاکٹر فاروق ستار ہیں۔

ایم کیو ایم پاکستان میں اب تک قیادت کا فقدان ہے جبکہ پارٹی کے اراکین پیپلز پارٹی اور پاک سر زمین پارٹی میں شمولیت اختیار کر رہے ہیں۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں