سونو نگم کو ٹویٹر پر اذان کی ویڈیو اپلوڈ کرنا بھی مہنگا پڑ گیا

سونو نگم کو ٹویٹر پر اذان کی ویڈیو اپلوڈ کرنا بھی مہنگا پڑ گیا

ممبئی: بھارتی گلوکار سونو نگم نے سوشل میڈیا پر اذان کے وقت کی ویڈیو اپ لوڈ کردی اور ساتھ گڈ مارننگ انڈیا کا پیغام بھی لکھا۔


پہلے وضاحت کی ،پھر سر منڈوایااور اب ایک اور پیغام دے ڈالا ،بھارتی گلوکار سونو نگم کے سوشل میڈیا پر ایک اور پیغام نے نئی بحث چھیڑ دی۔

سونو نگم نے اذان کی ویڈیو اپ لوڈ کی اور صرف گڈ مارننگ انڈیا کاپیغام لکھا ،جس کے ساتھ فجر کی اذان کی ویڈیو اپ لوڈ ہوتے ہی بھارتی میڈیا نے جلتی پر تیل ڈالا۔

بھارتی میڈیا میں اب یہ بحث چھڑ گئی کہ سونو نے یہ ویڈیو ثبوت کے طور پر پیش کی ہے کہ ان کے گھر اذان کی آواز آتی ہے۔

اس سے پہلے میڈیا میں رپورٹ ہوا تھا کہ ممبئی میں جہاں سونو نگم رہتے ہیں وہاں تو اذان کی آواز آتی ہی نہیں ، تو ان کی نیند خراب کیسے ہوتی ہے۔

سونونگم نے اس بات کی وضاحت نہیں کی کہ انہوں نے اذان کی ویڈیو ثبوت کے طور پر پیش کی ہے یا کسی اور وجہ سے ؟

17 اپریل کو اذان اور لاوڈ اسپیکر کے استعمال سے متعلق متنازعہ ٹوئٹس پر تنقید کے بعد سونو نگم نے وضاحت کی تھی کہ وہ اذان نہیں لاوڈ اسپیکر کے خلاف ہیں۔