حکومت تیل کی قیمتوں میں 70 سے 80 روپے فوری کم کرے، شہباز شریف

حکومت تیل کی قیمتوں میں 70 سے 80 روپے فوری کم کرے، شہباز شریف
کیپشن: ن لیگ کی جانب سے 10 ہزار کٹس ڈاکٹرز کو دی جائیں گی، شہباز شریف۔۔۔۔۔۔۔فائل فوٹو

لاہور: شہباز شریف نے کہا ہے کہ کرونا وائرس ٹیسٹ عام افراد کیلئے مفت کیے جائیں اور شرح سود کو کم کر دیا جائے، (ن) لیگ کی جانب سے 10 ہزار کٹس ڈاکٹرز کو دی جائیں گی اور ڈاکٹرز کو سیفٹی کٹس بھی مہیا کی جائیں گی۔

 صدر مسلم لیگ نون شہباز شریف نے نیوز کانفرنس کرتے ہوئے کہا کرونا کی وبا میں شدت آنے کے بعد نواز شریف نے واپسی کا کہا اور نواز شریف نے پیغام دیا وہ پاکستان کیلئے دعا گو ہیں، ڈاکٹرز نے جان ہتھیلی پر رکھ کر لوگوں کی خدمت کی اور پاکستان میں 890 کے قریب کرونا کیسز ہیں۔ کرونا وائرس جیسے چیلنج کا قوم کو سامنا ہے اور یقین ہے حکومت بر وقت اقدامات کرے گی جبکہ ایسی بات نہیں کرنی چاہیئے جس سے معاشرہ تقسیم ہو۔

شہباز شریف کا کہنا تھا کرونا نے پوری دنیا کو لپیٹ میں لے لیا ہے اور موجودہ صورتحال میں سیاست کو نہیں لانا چاہیئے، سب نے مطالبہ کیا کہ فی الفور لاک ڈاؤن کی طرف جانا چاہیے، ہمیں اس وقت ایک قوم بن کر کرونا وائرس کا مقابلہ کرنا چاہیے، معیشت کے مسائل کے ساتھ کرونا کا مقابلہ کرنا پڑ رہا ہے، بد قسمتی سے ہماری معیشت کمزور، معاشرے میں تقسیم ہے، ڈینگی کے مقابلے کیلئے ہم نے جرمنی سے سامان منگوایا۔

 صدر مسلم لیگ نون نے مزید کہا موجودہ صورتحال میں غریب عوام سخت پریشان ہے، حکومت غریب افراد کی امداد کیلئے پلان لائے، اضافی وینٹی لیٹرز سمیت دیگر طبی آلات کی فوری فراہمی کا اہتمام کیا جائے، حکومت کے اچھے اقدامات کی تعریف، غلطی پر اصلاح کی بات کرنا ہوگی، وائرس کے خاتمے تک دیہاڑی دار افراد کو وظیفہ دیا جائے، حکومت تیل کی قیمتوں میں 70 سے 80 روپے کم کرے۔

شہباز شریف نے کہا ہمیں اپنے پاس موجود وسائل کو استعمال کرنا ہوگا، بینظیر انکم سپورٹ پروگرام کی امدادی رقم میں اضافہ کیا جائے، مجھے یقین ہے انشااللہ ہم اس بحران سے نکل آئیں گے، ای او بی آئی کے فنڈز کو بھی امدادی کاموں میں استعمال کیا جاسکتا ہے۔