وزیردفاع خواجہ آصف نے کہا ہے کہ وفاق میں آئینی جنگ ہارنے کے بعد عمران خان اب خیبرپختونخوا کی صوبائی حکومت کے وسائل سےاسلام آباد پر حملہ آور ہو رہے ہیں۔ وفاقی حکومت ریاست کی رٹ کا بھر پور دفاع کرے گی۔
سماجی رابطے کی ویب سائٹ ٹوئٹر پر خواجہ آصف نے اپنے ٹوئٹ میں کہا کہ عمران خان کے ذاتی ایجنڈے کی تکمیل نہیں ہونے دی جائے گی۔
وفاق میں آئینی جنگ ھارنے کیبعدKPK IKحکومتی وسائل سےاسلام آباد پہ حملہ آور ھے.وفاقی حکومت ریاست کی رٹ کا بھر پور دفاع کرے گی اور IK کےذاتی ایجنڈے کی تکمیل نہیں ھونے دی جائے گی صوبائی اور وفاقی حکومتوں میں جنگ کی کیفیت سے ملکی سالمیت کو خطرات سے آہنی ھاتھ سے نمٹا جاۓ گا.انشاءاللہ
— Khawaja M. Asif (@KhawajaMAsif) May 24, 2022
انہوں نے کہا کہ صوبائی اور وفاقی حکومتوں میں جنگ کی کیفیت سے ملکی سالمیت کو خطرات سے آہنی ہاتھ سے نمٹا جائے گا۔
واضح رہے کہ پی ٹی آئی کے اسلام آباد کی جانب لانگ مارچ کے آغاز سے ایک دن قبل پنجاب کے مختلف شہروں میں پی ٹی آئی رہنماؤں اور کارکنان کیخلاف کریک ڈاؤن اور گرفتاریوں کا سلسلہ شروع کر دیا۔
پولیس نے رات گئے پی ٹی آئی رہنما اور سابق وفاقی وزیر حماد اظہر ، عثمان ڈار ، فردوس عاشق اعوان ، میاں اسلم اقبال اور بابر اعوان سمیت کئی دیگر رہنماؤں کے گھر وں پر چھاپے مارے تاہم پی ٹی آئی رہنماؤں کی گھر پر عدم موجودگی کے باعث پولیس واپس لوٹ گئی۔
پولیس شیخ رشید کی گرفتاری کیلئے لال حویلی بھی پہنچی تاہم سابق وزیرداخلہ وہاں موجود نہ تھے اور پولیس کو خالی ہاتھ واپس جانا پڑا۔تاہم حکومت کی جانب سے شیخ رشید کو نظر بند یا گرفتار کیے جانے کا امکان ہے۔
دوسری جانب لاہور کے علاقے ماڈل ٹاؤن میں پی ٹی آئی کارکن کے گھر پر چھاپے کے دوران پولیس ٹیم پر فائرنگ کی گئی جس میں ایک پولیس اہلکار چھاتی پر گولی لگنے سے شہید ہو گیا۔
