چین سے آزادی نہیں بلکہ ترقی چاہتے ہیں، دلائی لاما

چین سے آزادی نہیں بلکہ ترقی چاہتے ہیں، دلائی لاما

کلکتہ: تبت کے روحانی پیشوا دلائی لاما کا کہنا ہے کہ تبت کی آزادی نہیں بلکہ ترقی اور چین کے ہی ساتھ رہنا چاہتے ہیں۔ بھارتی میڈیا کے مطابق ایک تقریب سے خطاب کرتے ہوئے چین کے علاقے تبت کے روحانی پیشوا دلائی لاما کا کہنا تھا کہ ہم چین سے آزادی نہیں چاہتے ہیں ہم چین کے ساتھ ہی رہنا چاہتے ہیں تاہم ہم ترقی کا تقاضہ کرتے ہیں۔ تبت کے لوگوں کی الگ ثقافت اور دستور ہیں، جس طرح چین کے لوگ اپنے ملک سے پیار کرتے ہیں بالکل ایسے ہی ہم بھی اپنے ملک سے پیار کرتے ہیں۔


دلائی لامہ نے کہا کہ دریائے یانگزی سے لے کر دریائے سندھ تک تمام بڑے اور اہم دریا تبت سے ہی شروع ہوتے ہیں جن پر اربوں انسانوں کی زندگیوں کا انحصار ہے۔ لہذا تبت کا خیال رکھنے اور اس کی ترقی میں نہ صرف تبت بلکہ اربوں انسانوں کا بھی فائدہ ہے۔

یاد رہے کہ چین کے علاقے تبت کے روحانی پیشوا دلائی لامہ 1959 میں چین میں ایک ناکام تحریک کے بعد تبت سے جلا وطن ہو گئے تھے اور بھارت میں مقیم ہیں جب کہ دلائی لاما نے اس سے قبل متعدد بار چین سے آزادی کا مطالبہ کیا ہے۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں