لاہور: انٹرنیشنل کرکٹ کونسل (آئی سی سی) ٹی 20 ورلڈکپ میں پاکستان نے بھارت کو شکست دے کر نئی تاریخ رقم کر دی ہے جس پر ملک بھر میں تو جشن کا سماں ہے مگر بھارتیوں کیلئے یہ شکست ہضم کرنا مشکل ہو گیا ہے جنہوں نے ہار کا سارا ملبہ مسلمان کھلاڑی محمد شامی پر ڈال دیا ہے۔
930e8c9294ad1d28d7d65ec89fea7845
پاکستان نے باؤلنگ شروع کی تو شاہین شاہ آفریدی نے روہت شرما اور کے ایل راہول کو پویلین کی راہ دکھائی اور دیگر باؤلرز بھی خوب جوش میں نظر آئے جس کے بعدبابراعظم اور محمد رضوان نے پہلی ہی وکٹ میں ٹارگٹ حاصل کر کے 10 وکٹوں سے فتح اپنے نام کرتے ہوئے وہ کر دکھایا جو بھارت کو کئی سالوں تک بھول نہیں سکے گا۔
لیکن اس موقع پر بھی بھارتی اپنا دوغلا چہرہ دکھانے سے باز نہ آئے اور بھارتی ٹیم کے تمام کھلاڑیوں کو چھوڑ کر صرف مسلمان کھلاڑی محمد شامی پر تنقید کے نشتر چلانے میں مصروف ہیں اور سوشل میڈیا پر ان کے اکاؤنٹس پر کی گئی پوسٹس پر غلیظ کمنٹس کرنے کا سلسلہ جاری ہے۔
میچ کے دوران تمام بھارتی باؤلرز ہی بابراعظم اور محمد رضوان کے سامنے بے بس نظر آئے لیکن محمد شامی کا قصور صرف یہ ہے کہ اننگز کا 18 واں اوور انہوں نے کروایا جس میں محمد رضوان نے ایک چھکا اور دو چوکے لگائے اور پھر سنگل لی جس کے بعد بابراعظم نے 2 رنز لئے اور یوں مجموعی طور پر اوور میں انہوں نے 17 رنز دئیے۔ بھارتیوں کا کہنا ہے کہ محمد شامی بھارت کی طرف سے نہیں بلکہ پاکستان کی طرف سے کھیلے اور ہماری جیت ہار کا سبب بنے، اگر وہ صحیح گیند بازی کرتے تو جیت ہماری ہوتی۔
3feaf684f7ab774ad87d7276ed192615
سماجی رابطوں کی ویب سائٹ ٹوئٹر پر محمد شامی پر تنقید کا سلسلہ زور و شور سے جاری ہے اور انہیں پاکستانی ، پاکستان کی طرف سے کھیلنے والا کے طعنے دئیے جا رہے ہیں اور یہ بھی کہا جا رہا ہے کہ آپ پاکستان چلے جائیں اور اگلی مرتبہ پاکستان کی طرف سے ہی کھیلیں، حتیٰ کہ غلیظ گالیاں بھی پورے ’جوش و خروش‘ سے دی جا رہی ہیں۔
ایسے میں چند بھارتیوں نے محمد شامی کے حق میں آواز بھی بلند کی مگر اکثریت ان کے ساتھ وہ سلوک کرنے میں مصروف ہے جو کوئی بھی مہذب قوم اپنے کھلاڑیوں کے ساتھ نہیں کرتی۔
491951c18a204ccdb52115053fbb4733