شاہد خاقان اور مفتاح اسماعیل سمیت 7 افراد کے نام ای سی ایل میں شامل

شاہد خاقان اور مفتاح اسماعیل سمیت 7 افراد کے نام ای سی ایل میں شامل
احتساب بیورو کی درخواست پر 7 افراد کے نام ای سی ایل میں ڈالے گئے ہیں۔۔۔۔فائل فوٹو

اسلام آباد: وزارت داخلہ نے نیب کی درخواست پر سابق وزیراعظم شاہد خاقان عباسی اور مفتاح اسماعیل سمیت 7 افراد کے نام ای سی ایل میں ڈال دیے۔


قومی احتساب بیورو نے 7 افراد کو بیرون ملک جانے سے روکنے کے لیے ان کے نام ایگزٹ کنٹرول لسٹ میں ڈالنے کی سفارش کی تھی۔

وزارت داخلہ کی جانب سے نیب کو باقاعدہ ایک خط بھیجا گیا ہے جس میں بھیجے گئے تمام نام ای سی ایل میں ڈالنے سے آگاہ کیا گیا ہے۔

وزارت داخلہ کے خط میں بتایا گیا ہے کہ احتساب بیورو کی درخواست پر 7 افراد کے نام ای سی ایل میں ڈالے گئے ہیں جن میں سابق وزیراعظم اور مسلم لیگ (ن) کے رہنما شاہد خاقان عباسی، (ن) لیگی رہنما اور سابق وزیر خزانہ مفتاح اسماعیل کے نام بھی شامل ہیں۔

اس کے علاوہ مبین صولت، شاہد اسلام الدین، عمران الحق، عظمیٰ عادل خان اور عامر نسیم کا نام بھی ای سی ایل میں ڈالا گیا ہے۔

خیال رہے کہ سابق وزیراعظم شاہد خاقان عباسی اور مفتاح اسماعیل کے خلاف نیب ایل این جی کیس کی تحقیقات کر رہا ہے۔ اس سلسلے میں شاہد خاقان کئی مرتبہ نیب میں پیش بھی ہو چکے ہیں جب کہ مفتاح اسماعیل نے عدالت سے عبوری ضمانت بھی حاصل کر رکھی ہے۔