دورہ نیوزی لینڈ کیخلاف صہیب مقصود کو ٹیم میں شامل کیے جانے کا امکان

دورہ نیوزی لینڈ کیخلاف صہیب مقصود کو ٹیم میں شامل کیے جانے کا امکان

لاہور: نیوزی لینڈ کے خلاف ون ڈے سیریز میں سلیکٹرز اور ٹیم انتظامیہ کی نظریں ایک بار پھر جارحانہ بیٹنگ کرنے والے بیٹسمین صہیب مقصود پر مرکوز ہیں اور اس بات کے امکانات روشن ہیں کہ مڈل آرڈر بیٹنگ کو مضبوط کرنے کے لئے صہیب مقصود کو پاکستان ٹیم کا حصہ بنایا جائے گا۔اگر انہیں ٹیم میں شامل کیا گیا تو ٹیم میں ایک اضافی بیٹسمین کو بھیجا جائے گا۔حالانکہ صہیب مقصود پنڈی میں قومی ٹی ٹوئنٹی کرکٹ ٹورنامنٹ میں غیر معمولی کارکردگی دکھانے میں ناکام رہے تھے۔


ٹورنامنٹ میں فیصل آباد کی نمائندگی کرتے ہوئے صہیب مقصود نے 21,80,13,38,87,9,0 رنز بنائے۔تاہم چیف سلیکٹر انضمام الحق نے پنڈی میں صہیبب مقصود سے ملاقات کی اور ساتھی سلیکٹرز سے مشاورت بھی کی جبکہ کوچ مکی آرتھر اور کپتان سرفراز احمد کو بھی اعتماد میں لیا گیا ہے۔صہیب مقصود ورلڈ کپ 2015 کے علاوہ پاکستان ٹیم کے ساتھ تین بار نیوزی لینڈ کا دورہ کر چکے ہیں۔ گذشتہ سال بھی انہوں نے پاکستان ٹیم کے ساتھ نیوزی لینڈ کا دورہ کیا تھا لیکن خاطر خواہ کارکردگی دکھانے میں ناکام رہے تھے۔ملتان سے تعلق رکھنے والے 30 سالہ صہیب مقصود پاکستان کی جانب سے 26 ون ڈے انٹر نیشنل میں 735 اور 20 ٹی ٹوئینٹی انٹر نیشنل میں 221 رنز بنا چکے ہیں۔