دہشت گردی کیخلاف پاکستان کی کوششوں کو دنیا تسلیم کرے، چین

دہشت گردی کیخلاف پاکستان کی کوششوں کو دنیا تسلیم کرے، چین

بیجنگ: امریکی وزیر خارجہ کے دورہ پاکستان پر ردعمل دیتے ہوئے ترجمان چینی وزارت خارجہ کا کہنا تھا کہ پاکستان اور امریکا کے درمیان انسداد دہشت گردی کے باہمی تعاون پرخوش ہیں اور چین دہشت گردی کے خلاف بین الاقوامی تعاون کا خیرمقدم کرتا ہے۔ ترجمان چینی وزارت خارجہ نے کہا کہ پاک امریکا تعلقات باہمی اعتماد اور علاقائی امن و استحکام بڑھانے میں سازگار ثابت ہوں گے۔


چین کی وزارت خارجہ کے مطابق پاکستان نے عالمی امن اور علاقائی استحکام کیلئے بہت کام کیا اور دہشتگردی کے خلاف جنگ میں پاکستان سب سے آگے ہے۔ بیجنگ سے جاری بیان کے مطابق پاکستان نے دہشتگردی کے خلاف جنگ میں گراں قدر قربانیاں دی ہیں لہذا عالمی برادری کو دہشت گردی کے خالف پاکستان کی کوششوں اور قربانیوں کو تسلیم کرنا چاہیے۔

یاد رہے کہ دو روز قبل امریکی وزیر خارجہ ریکس ٹلرسن نے پاکستان کا دورہ کیا تھا جہاں انہوں نے وفود کی سطح پر پاکستان کی سیاسی و عسکری قیادت سے ملاقات کی تھی۔ ملاقات کے دوران پاک امریکا تعلقات سمیت افغانستان اور خطے کی صورت حال پر بھی تبادلہ خیال کیا گیا تھا۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں