بنگلہ دیش سے شکست،آفریدی کا ٹیم کی کارکردگی پر مایوسی کا اظہار

بنگلہ دیش سے شکست،آفریدی کا ٹیم کی کارکردگی پر مایوسی کا اظہار
تصویر بشکریہ ٹوئٹر

لاہور :ایشیا کپ سپر فور مرحلے میں بنگلہ دیش کے ہاتھوں عبرتناک شکست پر ٹی 20 کے سابق کپتان شاہد آفریدی نے بھی مایوسی کا اظہار کیا ہے۔


تفصیلات کے مطابق سماجی رابطے کی ویب سائٹ ٹوئٹر پر پیغام جاری کرتے ہوئے بوم بوم آفریدی نے بنگلہ دیش کو مبارک باد پیش کی اور کہا کہ انہیں پاکستانی ٹیم کی پوری کارکردگی سے کافی مایوسی ہوئی ہے۔کرکٹ کے ہر شعبہ میں کمی دیکھنے کو ملی۔

آفریدی نے لکھا کہ گزشتہ ٹورنامنٹ میں نوجوانوں کی طرف سے بہت اچھی کرکٹ کھیلی گئی تھی جس کے بعد توقعات بڑھ گئی تھیں۔انہوں نے کہا کہ قومی کرکٹ ٹیم کو زبردست واپسی کے لیے زیادہ توجہ اور محنت کی ضرورت ہے۔

خیال رہے کہ گزشتہ روز ابوظہبی کے شیخ زید سٹیڈیم میں بنگلہ دیش کے خلاف کھیلے گئے میچ میں سرفراز الیون کو 37 رنز سے شکست کا سامنا کرنا پڑا۔قومی کرکٹ ٹیم کو ایشیا کپ میں غیر سنجیدگی کا مظاہرہ کرنے پر اب شدید تنقید کا سامنا ہے۔