اسلام آباد: احتساب عدالت میں صحافیوں سے غیر رسمی گفتگو کرتے ہوئے نواز شریف نے کہا کہ میرے اٹک قلعہ میں طیارہ ہائی جیک اور اس کیس میں مؤقف ایک ہی ہے اور اُس وقت نکالے جانے کی وجوہات بھی یہی تھیں۔
سابق وزیراعظم نے کہا کہ قوم طیارہ ہائی جیک کیس کو مانتی ہے اور نہ ہی موجودہ کیس کو کیونکہ میرے بیانیے اور مؤقف کی ہی جیت ہو گی اور فتح کے علاوہ دوسری منزل ہی کوئی نہیں ہے۔
نواز شریف نے کہا کہ مسلم لیگ (ن) ہی واحد جماعت ہے جس نے کام کیا اور دوسری جماعتوں کی کارکردگی نہ ہونے کے برابر ہے۔ وہ اپنے کسی منصوبے کا بتائیں اور خود عمران خان بتائیں آج تک کون سا منصوبہ مکمل کیا ہے۔
مزید پڑھیں: نواز شریف کا عیدالفطر اہلیہ بیگم کلثوم نواز کیساتھ منانے کا فیصلہ
سابق وزیراعظم کا کہنا تھا کہ کارکردگی مرکز کی ہی ہے جس نے دہشت گردی کا خاتمہ کیا۔ سی پیک لائے، بڑے بڑے موٹرویز بنائے اور مولانا فضل الرحمان سے پوچھیں کہ ڈی آئی خان میں کتنی تیزی سے موٹروے بن رہا ہے۔
نواز شریف نے کہا کہ بلوچستان اور کراچی کا امن ہم نے ٹھیک کیا۔ بھتہ خوری کی وارداتیں ختم ہوئیں جب کہ رمضان المبارک میں 22، 22 گھنٹے کی لوڈشیڈنگ ہوتی تھی لیکن آج 45 اور 47 ڈگری سینٹی گریڈ میں بھی بجلی دے رہے ہیں۔
سابق وزیراعظم نے شکوہ کیا کہ ہمیں وقت ہی کتنا ملا صرف 2014 کے دھرنے کے بعد 2016 تک کام کیا اور پھر پاناما شروع ہو گیا۔ ہمیں کام کے لئے صرف ڈیڑھ دو سال ملے اگر پورے 5 سال ملتے تو اور کام کرتے۔
یہ بھی پڑھیں: فاٹا کے انضمام کا بل خیبر پختونخوا اسمبلی سے بھی منظور
نگراں وزیراعظم سے متعلق سوال پر نواز شریف نے کہا کہ نگراں وزیراعظم کے لئے ہم نے اچھے نام دیے اور ہم ایسا نام نہیں دے سکتے جسے عوام قبول نہ کرے۔ نگراں وزیراعظم ایسا ہو جسے قوم بھی کہے اچھا نام ہے۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
