کراچی: انگلینڈ کرکٹ ٹیم کے کپتان بین سٹوکس نے دورہ پاکستان پر خوشی کا اظہار کرتے ہوئے کہا ہے کہ ٹیسٹ سیریز کی فیس پاکستان کے سیلاب متاثرین کیلئے عطیہ کرنے کا اعلان کیا ہے۔
تفصیلات کے مطابق بین سٹوکس نے کہا کہ تاریخی سیریز کے سلسلے میں پہلی مرتبہ پاکستان آ کر بہت اچھا لگ رہا ہے اور 17 سال بعد پاکستان میں ٹیسٹ سکواڈ کا حصہ ہونے پر بہت پرجوش ہوں۔
بین سٹوکس کا کہنا تھا کہ پاکستان میں تباہ کن سیلاب کو دیکھ کر بہت دکھ ہوا، سیلاب کے ملک اور عوام پر خاصے اثرات مرتب ہوئے، ٹیسٹ سیریز کی اپنی میچ فیس پاکستان کے سیلاب متاثرین کیلئے عطیہ کر رہا ہوں۔
انگلش ٹیم کے کپتان بین سٹوکس نے مزید کہا کہ کھیل نے زندگی میں مجھے بہت کچھ دیا ہے، سمجھتا ہوں کہ کرکٹ سے بالاتر ہو کر کچھ واپس دوں، امید ہے کہ یہ عطیہ سیلاب سے سب سے زیادہ متاثرہ علاقوں کی تعمیر نو میں مدد کرے گا۔
