لاہور: وزیرِ جیل خانہ جات و ترجمان پنجاب حکومت فیاض الحسن چوہان کا بلاول زرداری کے بیانات پر ردعمل ، کہا بلاول زرداری کچی عمر میں آصف زرداری سے منفی سیاست کے سارے گن سیکھ چکے ہیں ۔
اپنے بیان میں فیاض الحسن چوہان نے کہا کہ وزیر اعلیٰ پنجاب سردار عثمان بزدار نے اپنی پرفارمنس سے تمام وزرائے اعلیٰ کو مات دے دی ہے ۔ انہوں نے کہا کہ موروثی سیاست کی پیداوار بلاول سردار عثمان بزدار کو کٹھ پتلی کہنے سے پہلے اپنے گریبان میں جھانکیں ۔
ترجمان پنجاب حکومت نے کہا کہ دن میں تارے دیکھنے والے قائم علی شاہ عشروں سے سندھ کی وزارت اعلیٰ پر براجمان ہیں ۔ قائم علی شاہ کے سندھ اور آج عثمان بزدار کے پنجاب میں زمین آسمان کا فرق ہے ۔ پنجاب صحت انصاف کارڈ اور یونیورسٹیاں بنا کر عوام کا بوجھ بانٹ رہا ہے ۔
انہوں نے کہا کہ سندھ نے صاف پانی اور صحت کی مناسب سہولتیں بھی عوام سے چھین لیں ۔ پنجاب نے کورونا کو مات دے دی ، سندھ کورونا کے سب سے زیادہ کیسز پیدا کرتا رہا ۔ آصف علی زرداری کی کٹھ پتلی سندھ کابینہ اور رشتہ دار وزیر ہر محاز پر فیل ہیں ۔ وزیر اعلیٰ پنجاب سردار عثمان بزدار آئے روز پرفارمنس کے نئے سنگ میل عبور کر رہے ہیں ۔
