بال ٹمپرنگ اسکینڈل: سابق آسٹریلوی کپتان پریس کانفرنس کے دوران رو پڑے

بال ٹمپرنگ اسکینڈل: سابق آسٹریلوی کپتان پریس کانفرنس کے دوران رو پڑے

سڈنی: بال ٹمپرنگ اسکینڈل میں ایک سال کی پابندی لگنے کے بعد سابق آسٹریلوی کپتان اسٹیون اسمتھ پریس کانفرنس کرتے ہوئے رو پڑے۔


میڈیا سے گفتگو کرتے ہوئے سابق آسٹریلوی کپتان اسٹیون اسمتھ نے کہا کہ وہ کرکٹ سے بہت محبت کرتے ہیں، مجھے نوجوانوں کا کرکٹ جیسے عظیم گیم کو کھیلنا اچھا لگتا ہے۔ گفتگو کے دوران اسٹیون اسمتھ لمبی لمبی آہیں بھرتے رہے اور زارو قطار روتے رہے جس پر پیچھے کھڑے ان کے والد نے ان کے کاندھے پر تھپکی دے کر انہیں سہارا دینے کی کوشش کی۔

واضح رہے کہ جنوبی افریقا کے خلاف کیپ ٹاؤن ٹیسٹ میں آسٹریلوی کھلاڑی بینکرافٹ ٹھوس چیز کے ساتھ چھیڑ چھاڑ کر رہے تھے اور یہ منظر کیمرے کی آنکھ نے بھی محفوظ کر لیا تھا۔

آئی سی سی نے اس واقعے کا فوری نوٹس لیتے ہوئے آسٹریلوی کپتان اسٹیون اسمتھ پر میچ فیس کا 100 فیصد جرمانہ اور ایک میچ کی پابندی عائد کر دی تھی جب کہ کیمرون بینکرافٹ پر بھی میچ فیس کا 75 فیصد جرمانہ عائد کیا تھا۔

کرکٹ آسٹریلیا نے بھی فوری طور پر ایک دو رکنی کمیٹی تشکیل دی تھی جس کے بعد اسٹیون اسمتھ اور ڈیوڈ وارنر کو فوری طور پر وطن واپس طلب کر کے دونوں کھلاڑیوں پر ایک سال کی پابندی عائد کر دی تھی۔