اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ عبدالحفیظ شیخ کی وزیر خزانہ کے عہدے سے برطرفی پاکستان ڈیمو کریٹک موومنٹ(پی ڈی ایم ) کی فتح ہے۔
تفصیلات کے مطابق بلاول بھٹو زرداری نے حکومت کی جانب سے حکومت کی جانب وفاقی وزیر برائے خزانہ عبدالحفیظ شیخ کو عہدے سے برطرف کرنے پر ردعمل دیتے ہوئے کہا سینیٹ میں شکست کے بعدعہدے پر رہنا ناممکن ہو گیا تھ اور آئی ایم ایف وزیر کو عہدے کیلئے منتخب ہونے کی ضرورت تھی۔
cca3a5859dba0a072d661c78dd8df874
ان کا مزید کہنا تھا کہ حکومت نے تسلیم کر لیا کہ ناکام پالیسیوں سے مہنگائی آسمان پر پہنچ گئی اور ان کی پالیسیوں کی نتائج کہیں بھی نظر نہیں آ رہے۔
خیال رہے کہ حکومت نے عبدالحفیظ شیخ کو وزیرخزانہ کے عہدے سے ہٹا کر حماد اظہر کو وفاقی وزیرخزانہ کا قلمدان دینے کا فیصلہ کر لیا ہے۔ حفیظ شیخ آج اپنے دفتر بھی نہیں آئے جبکہ ان کو ہٹانے کا نوٹیفکیشن بھی جلد جاری کر دیا جائے گا۔
گزشتہ ہفتے وزیراعظم عمران خان نے پیٹرولیم بحران کے پیش نظر معاون خصوصی برائے پیٹرولیم ندیم بابر کوعہدہ چھوڑنے کی ہدایت کی تھی جس کے بعد انہوں نے یہ عہدہ چھوڑ دیا تھا۔
واضح رہے کہ 11 دسمبر 2020 کو ڈاکٹر عبدالحفیظ شیخ نے وفاقی وزیر کے عہدے کا حلف اٹھایا تھا جس کے بعد وزیراعظم عمران خان نے انہیں وزیر خزانہ کا منصب تفویض کر دیا تھا۔ قبل ازیں ڈاکٹر عبد الحفیظ شیخ وزیر اعظم کے مشیر برائے خزانہ کے عہدے پر فائز تھے۔
عبدالحفیظ شیخ سابق صدر پرویز مشرف کے دور حکومت میں مسلم لیگ (ق) کے ٹکٹ پر اور یوسف گیلانی کے دور میں پیپلز پارٹی کے ٹکٹ پر سینیٹ کے رکن منتخب ہو چکے ہیں۔
عبدالحفیط شیخ نے معاشیات میں پی ایچ ڈی کی ڈگری حاصل کر رکھی ہے اور وہ مایہ ناز تعلیمی ادارے ہارورڈ یونیورسٹی میں پڑھا چکے اور کئی برسوں تک عالمی بینک کے ساتھ کام کر چکے ہیں۔
صوبہ سندھ سے تعلق رکھنے والے عبد الحفیظ شیخ 2003 سے 2006 تک وزیر برائے نجکاری اور سرمایہ کاری کے منصب پر بھی فائز رہے۔ بعدازاں پاکستان پیپلز پارٹی کے دورِ حکومت میں وہ مارچ 2010 سے 19 فروری 2013 تک وزیر خزانہ، محصولات اور اقتصادی امور کے فرائض سر انجام دیتے رہے۔
پاکستان تحریک انصاف (پی ٹی آئی) کے دورِ حکومت میں اسد عمر کے وزیر خزانہ کے عہدے سے مستعفی ہونے کے بعد 19 اپریل 2019 کو حفیظ شیخ کو وزیراعظم کے مشیر خزانہ کے منصب پر تعینات کیا گیا تھا۔
