لاہور: وزیراعظم پاکستان عمران خان کی سابق معاون خصوصی برائے اطلاعات فرودس عاشق اعوان نے پاکستان مسلم لیگ (ن) شمولیت کے حوالے سے خبروں پر ردعمل دیتے ہوئے انہیں جعلی اور من گھڑت قرار دیدیا ہے۔
تفصیلات کے مطابق فردوس عاشق اعوان نے سماجی رابطوں کی ویب سائٹ ٹوئٹر پر جاری پیغام میں لکھا ’ سوشل میڈیا پر میرے بارے میں (ن) لگ میں شمولیت کے حوالے سے گردش کرنے والی خبر من گھڑت، بے بنیاد اور حقائق کے منافی ہے۔‘
واضح رہے کہ گزشتہ روز یہ خبریں سامنے آئی تھی کہ فردوس عاشق اعوان نے پاکستان مسلم لیگ (ن) میں شمولیت کی خواہش کا اظہار کیا ہے اور اس ضمن میں انہوں نے گزشتہ ہفتے لندن میں نواز شریف اور اسحاق ڈار سے ملاقات کرنے والے معروف گلوکار وارث بیگ کے ذریعے اپنا پیغام پہنچایا۔
ذرائع کا کہنا تھا کہ فردوس عاشق اعوان نے لندن میں مسلم لیگ (ن) کی اعلیٰ قیادت کو پیغام بھجوایا کہ وہ (ن) لیگ میں شامل ہونا چاہتی ہیں تاہم انہوں نے سیالکوٹ میں ٹکٹ کا مطالبہ نہیں کیا۔
مسلم لیگ (ن) کی اعلیٰ قیادت نے فردوس عاشق اعوان کے معاملے پر 10 منٹ تک بات چیت کی لیکن انہیں ابھی کوئی یقین دہانی نہیں کروائی گئی اور اتنا ہی کہا گیا کہ اس معاملے پر مسلم لیگ (ن) پنجاب کی قیادت سے رابطہ کیا جائے گا۔
