’پی ٹی آئی سیلاب پر بھی سیاست کر رہی ہے، کہا گیا یہ امپورٹڈ حکومت ہے اس کی مدد نہ کریں‘

لاہور: وفاقی وزیر میاں جاوید لطیف نے کہا کہ پی ٹی آئی سیلاب پر بھی سیاست کر رہی ہے ۔ کہا گیا یہ امپورٹڈ اور کرپٹ حکومت ہے اس کی مدد نہ کریں ۔

میڈیا سے گفتگو کرتے ہوئے وفاقی وزیر نے کہا کہ سیلاب سے ہونے والے نقصان کو پورا کرنے میں کئی سال لگیں گے ، گزشتہ 4 سال میں معیشت تباہ نہ ہوتی تو متاثرین کی بحالی میں کم وقت لگتا ۔

انہوں نے کہا کہ پی ٹی آئی نے قومی مفادات پر سودے بازی کی ، جب نواز شریف کو نااہل کردیا گیا تو اس وقت ہم نے کوئی خط نہیں لکھا ۔ تمام ناانصافیوں کے باوجود ہم نے ملکی سالمیت پر سمجھوتہ نہیں کیا اور نہ ہی کبھی شکایت کی ۔

جاوید لطیف نے کہا کہ عمران خان کی زیر قیادت پارٹی اجلاس میں سودے بازی کے فیصلے کئے گئے ۔ شوکت ترین اس سازش کا پارٹ ون نہیں بلکہ پارٹ فور ہے ۔ شوکت ترین کو فوری گرفتار کرکے اس معاملے کی تحقیقات ہونی چاہئے ۔ پاکستان کیخلاف ہونے والی عالمی سازش کو بے نقاب کرکے قوم کے سامنے لایا جائے ۔

انہوں نے کہا کہ کسی کی فون کال ریکارڈ کرنے کے حق میں نہیں ، لیکن ریاست کیخلاف کام کرنے والوں کو بے نقاب کرنا ایجنسیوں کا کام ہے ۔ کیا کبھی نواز شریف ، آصف زرداری ، حاصل بزنجو یا کسی اور سیاستدان نے ایسی حرکت کی ہے ۔ یہ لاڈلہ اگر نوکری پر لگا ہو تو سب کچھ ٹھیک ہے ۔ عمران خان اداروں کی منتیں کر رہے ہیں انہیں دوبارہ نوکری پر لائیں ۔

وفاقی وزیر نے کہا کہ گھڑی چور آزاد پھر رہا ہے جبکہ ملک کو ترقی کی راہ پر ڈالنے والا نواز شریف سزا بھگت رہا ہے ۔