ایل او سی پر بھارتی فائرنگ مقبوضہ کشمیر میں ناکامی کی عکاس ہے، ترجمان پاک فوج

ایل او سی پر بھارتی فائرنگ مقبوضہ کشمیر میں ناکامی کی عکاس ہے، ترجمان پاک فوج
بھارت معصوم شہریوں کو مسلسل نشانہ بنا رہا ہے اور شہریوں کی حفاظت کو ہر صورت یقینی بنایا جائے گا، میجر جنرل آصف غفور۔۔۔۔۔۔فوٹو/ بشکریہ آئی ایس پی آر

راولپنڈی: ڈی جی آئی ایس پی آر میجر جنرل آصف غفور نے کہا ہے کہ ایل او سی پر بھارتی فائرنگ مقبوضہ کشمیر میں ناکامی کی عکاس ہے اور ایل او سی پر بھارتی فائرنگ کا موثر جواب دیا جائے گا۔


ڈی جی آئی ایس پی آر میجر جنرل آصف غفور نے سماجی رابطے کی ویب سائٹ پر ٹویٹ کرتے ہوئے کہا بھارت معصوم شہریوں کو مسلسل نشانہ بنا رہا ہے اور شہریوں کی حفاظت کو ہر صورت یقینی بنایا جائے گا۔

دوسری جانب پاکستان نے بھارت کو جنگی جنون سے باز آنے کا کہہ دیا۔ بھارتی ڈپٹی ہائی کمشنر کو دفتر خارجہ طلب کر کے ایل او سی کی مسلسل خلاف ورزی پر احتجاج کیا گیا۔ بھارتی ڈپٹی ہائی کمشنر کی طلبی ڈی جی ساؤتھ ایشیا و سارک ڈاکٹر محمد فیصل نے کی۔

ترجمان دفتر خارجہ نے کہا بھارتی افواج نے ایل او سی کے دننا، ڈھنڈیال، جوڑا، لیپا، شاہ کوٹ اور شاردہ سیکٹرز پر منگل کو بلا اشتعال فائرنگ کی جس سے ایک شہری شہید جبکہ 9 زخمی ہوئے اور بھارتی افواج مسلسل شہری آبادی کو بھاری اسلحہ سے نشانہ بنا رہی ہیں۔ جو انسانی عظمت، بین الاقوامی انسانی حقوق اور قوانین کی خلاف ورزی ہے۔

ڈاکٹر محمد فیصل کا مزید کہنا تھا کہ بھارت کی طرف سے جنگ بندی کی خلاف ورزی علاقائی امن و سلامتی کے لئے خطرہ ہے، بھارت اپنی افواج کو فائر بندی پر مکمل عملدرآمد کا پابند بنائے، ایل او سی اور ورکنگ باونڈری پر امن برقرار رکھے اور اقوام متحدہ فوجی مبصر مشن کو سلامتی کونسل کی قراردادوں کے مطابق کردار ادا کرنے دے۔