اسلام آباد: احتساب عدالت میں سابق وزیراعظم نواز شریف کے خلاف العزیزیہ اسٹیل ملز ریفرنس کی سماعت کے دوران نواز شریف کے وکیل خواجہ حارث نے احتساب عدالت کے جج محمد بشیر کی جانب سے دیگر 2 ریفرنسز کی سماعت پر اعتراض اٹھا دیا۔ احتساب عدالت کے جج محمد بشیر نے نواز شریف کے خلاف العزیزیہ ریفرنس کی سماعت کی۔
سماعت کے دوران پاناما جے آئی ٹی کے سربراہ واجد ضیا بطور گواہ عدالت میں پیش ہوئے۔ آج نواز شریف کے وکیل نے واجد ضیاء پر جرح جاری رکھنی تھی تاہم سماعت کے آغاز پر ایڈووکیٹ خواجہ حارث نے جج محمد بشیر کی جانب سے باقی دو ریفرنسز کی سماعت کرنے پر اعتراض اٹھاتے ہوئے کہا کہ وہ یہ کیس سن ہی نہیں سکتے۔
مزید پڑھیں: سزا یافتہ کیپٹن (ر) صفدر کو اڈیالہ جیل بھیج دیا گیا
خواجہ حارث کا موقف تھا کہ چونکہ جج محمد بشیر شریف خاندان کے خلاف ایون فیلڈ ریفرنس کا فیصلہ دے چکے ہیں۔ لہذا مناسب یہی ہے کہ وہ دیگر 2 ریفرنسز (العزیزیہ اسٹیل ملز اور فلیگ شپ انویسٹمنٹ) کی سماعت نہ کریں۔
جج محمد بشیر نے ریمارکس دیئے کہ سپریم کورٹ کی طرف سے دی گئی (10 جولائی کی) مدت بھی ختم ہو رہی ہے۔ اس سے متعلق خط لکھنا بھی میرا کام ہے لہذا بہتر یہی ہے کہ اس خط میں یہ ساری باتیں لکھ دی جائیں۔ جس پر خواجہ حارث نے جواب دیا کہ مناسب یہ ہے کہ سپریم کورٹ کو خط میں آپ ان باتوں کا حوالہ بھی دے دیں۔
خواجہ حارث کا مزید کہنا تھا کہ سپریم کورٹ سے ہدایات ملنے کے بعد ہی مزید کارروائی آگے بڑھائی جائے۔ ساتھ ہی انہوں نے کہا ہم تو چاہتے تھے کہ تمام ریفرنسز کا فیصلہ ایک ساتھ کر دیں۔
یہ بھی پڑھیں: لندن میں نواز شریف کے گھر پر حملہ، دروازہ توڑنے کی کوشش
سماعت کے دوران خواجہ حارث نے سابق وزیراعظم نواز شریف کی حاضری سے استثنیٰ کی درخواست دائر کرتے ہوئے استدعا کی کہ نواز شریف اور ان کی صاحبزادی مریم نواز جمعہ 13 جولائی کو لندنس سے واپس پاکستان آ رہے ہیں لہذا پیر 16 جولائی تک سماعت ملتوی کر دیں۔ تاہم عدالت نے سماعت 12 جولائی تک کے لیے ملتوی کر دی۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
